Tomana

Kararua, Karkarma, Aningaas. Nalabit adu kadatayo nga Ilokano ti pamiliar dagitoy a termino. Lukibentayo ti El Folk-Lore Filipino ket adda pangangilawlawag ni Don Beling kadagitoy, nga impatarus met ni Manong Ariel Sotelo Tabag iti Sirib ti Puli ni Ilokano. Ngem kasano no iti maysa a nobela a naisurat iti Ilokano ket kasla saan met nga Ilokano dagiti karakter nga aggunggunay ket dagiti kannawidanda ket saan met a kostumbre wenno pammati dagiti Ilokano? Paset pay laeng kadi daytoy iti Literatura Ilokana?

Mabalin a kastoy ti mapadasan no basaentayo daytoy a libro a Tomana ni Apo Juan S.P. Hidalgo Jr., mapapati nga ama ti moderno a Literatura Ilokana. Adda datdatlag a marikna iti agbasa. Siempre, nairuamtayon iti kinadatdatlag kadagiti nobela nga Ilokano. Impluensia daytoy dagiti oral a tradision a kannawidan dagiti Ilokano, kas impaganetget ni Resil Mojares iti IOrigins and Rise of the Filipino Novel. Iti sabali a pannao, ti napaypayso a Literatura Ilokana ket nakaramut iti tradision, pakasaritaan, ket kabibiag dagiti Ilokano. Kasta pay, nakamaldit kadagiti obra ni Ilokani a mannurat ti pakasaritaan ti ilina, ti Filipinas, uray pay no agtaytayyek ti naratibo kadagiti espisipiko ken nailet a lugar. Ket no ngay saan?